Volume 25, 2023 (CEBC-INDY) May 07, 2023
“CEBC-INDY, HUMANITARIAN & RELIEF MINISTRY RIAN IN KA KHUALLAM”
“Mahzawnlawng i ruahnak le duhfah hakkauhnak cu thlachiat a ruat lo i mi cungah
zaangfahnak a ngei lo. A hnah a chuak, a lung a puam i aa porhlaw. Mahzawnlawng i ruahnak le duhfah hakkauhnak cu tlabulbal in khua a sa i amah zawn lawng aa ruat; a thin a tawi, midang fahnak cungah khan diriam in a um, biatak tu ah khan aa lawm lo. Mah zawn lawng i ruahnak le duhfah hakkauhnak cu a lung a sau bal lo i a thin a fual bal fawn lo”.
Ne Win,Than Shwe, le Min Aung Hlaing hna nih ”Setan” thinlung kengin uk le pen timhnak nih zaanmang chia le muihnak chuum bang a kan zelhnak caan chia chung kan i zelh lioah Generation “Z” hna le miphun dawtu hna nih nunnak thap in, kan thisen nih ramthlennak bia phuang ve cang seh tiin, doral an kham lioah, cung Zingnu kan biak Pathian sinah chim lang. Zaan mitchin lo le ei ulh, nun ulh in maw, kan dohral ciamser cang seh tiin teimanthluin; kan co thluachuah hna hmang in tuan zairel lang. CEBC hmangin vawlei cul seh, Pathian nun le maw thuam, dawtnak tlangzaam seh Khrih pennak kan phak hlan tiang.
Ka khuallam (March 15, 2023 - April 19, 2023)
Pathian dawtnak ka theih hnu hin mi dawt khawhnak, ram le miphun dawknak, siaherh venak thinlung le Thlarau lei siaherhnak hi Pathian thluachuah le velngeihnak hrawmh chih ka si tiah kaa ruat. Kan ram le miphun nih atakin harnak an ton lioah zei tetal kan bawm kho ve hna hnga maw ti in khrifabu nih thlah ka si ve caah Pathian sin ah kai lawm i ka thinlung zong a cawl taktak.
March 15-17, 2023 - United State in India ah kan zuang. Pathian vel thawngin kan khuallam he pehtlai in tuanvo ngeitu poh an tha dih, kan tluang taktak. March 18, 2023 - Delhi in Aizawl kan phan i, March 19 - 20, 2023- Aizawl ah kan cam hna. Khrihfabu pathum ah thawngtha chim in caan kan hman hnu ah CEBC hmangin Pathian nih khualbuk a sermi ah pumhnak le biaruahnak kan ngeihpi hna. Vawleicung huap in kan ram caah a cawlcaangmi Aizawl khuasa Doctor hna he biaruahnak le tirawl hrawmtinak kan ngei hna.
March 21, 2023 - Aizawl in Hnahthial ah kan kal i, March 22, 2023 - Hnahthial district camp pawl ah kan va leng hna. 1. Hnahthial khua chung camp chungkhar 10 hna sin kan len hnu ah a zaan ah pumhnak le biaruahnak. 2. Khuahri chungkhar 9, TABC ngaktah hna le Tarpho chungkhar 6 hna hi hmunkhat. 3. Old, New Hngarchip, Bualpi, le Cerhlun phukhat ah le 4. Thingsai khua ah pumhnak le biaruahnak kan ngei kho hna. Hnahthial khua ah Sayama Zil Hing (nurse) kan chiah.
March 23, 2023 - Hnahthial - Lunglei ah kan kal i Lunglei khuachung ummi hna he pumhnak le biaruah tinak kan ngeih hnu ah Thaizawl camp ah pumhnak le biaruah tinak kan ngei than hna. Hi camp ahhin Sayama Mah Pai (Nurse) kan chiah.
March 25-26, 2023 hi Lawngtai District camp 12 a ummi chungah camp 7 ah kan leng kho. Sunday ah khrihfabu 3 ah phung kan chim hna. Pumh dih in Lawngtlai khuachung a ummi Thantlang in a zaammi hna he pumhnak le bia ruahnak kan ngei kho.
Lawngtlai hi Doctor Bawi Cin umnak le LIKBK sizung i a ṭuannak a si. March 27, 2023 - Lawngtlai in Saiha ah kan kal i Niawhtlang camp ummi he biaruahnak kan ngeih hnu ah zaan pumhnak Saiha khuachung ummi hna he pumhnak le biaruahnak kan ngei hna.
Lungzarhṭum camp, le Ceural camp
March 28,2023 - Saiha in Sangau ah kan kal i lungzarhṭum camp le Ceural camp ah pumhnak le biaruah tinak kan ngeih hnu ah Sahau kan phan. Sangau khuachung um ralzaam hna he zaan pumhnak le biaruah tinak kan ngei hna. Sangau khua hi Doctor Lyli kan chiahnak a si.
March 29, 2023 - Sangau in Thau ah kan kalpah ah Bualpi camp ummi hna he pumhnak le biaruahnak kan ngei hna. Bualpi khua hi Sayamah Hnem Tawi (Nurse) a tuannak a si.Thau khua kan phak zaan ah Sizung zohṭinak, pumhnak le a thaizing ah upa hna he tonnak le siangin ah thlacam le biaruah ṭinak kan ngei kho.Thau khuami nih vok in hang an kan soh.
March 30, 2023 - Thau in Tikir lei kan kalpah Ruafiang ah TCDF headquarter kan palpah hna i Thau khua nih an kan thahmi vok a um in kan chiah ta hna. Mah ni hi Khuafo a kah ni kha a si. Tikir kan phak zaan ah CDF chaplin hna le IDP camp nurse kan chiahmi hna he ton biaruahnak le tirawl dum tinak kan ngei hna. Saya Thawng Tha Hmun (Chaplin) Chungkhar nih vok in an tuahmi a si. Azaan ah Tikhir khuami hna he pumhnak kan ngei hna.
March 31, 2023 - Tikir in Salen khua ah kan kal i Salen IDP camp ah kan i chawhpah dih hnu ah Nurse kan chiahmi inn zohnak le camp ummi hna he pumhnak lebiaruah ṭinak kan ngei.
March 31 in April 3, 2023 tiang hi Bungkhua ah caan kan hmang. Bungkhua IDP camp committee hna he ton biaruah ṭinak le pumh ṭinak kan ngei hna. Bungkhua hi arhpi kan hmang nain mithi an um caah Biakinn ah pum loin, mithi chungkhar inn ah kan i pum hna. April 3, 2023 cu Bungkhua in Zaangtlang, Lungler, Sihhmuh, le Thangzang khuathar ah caan hmannak le biaruahnak kan ngei kho hna. Abikin, Lungler le Thangzang ah saudeuh caan kan hmang. April 4 - 8, 2023 hi Sopum, Vanzang, Farrawn le Tlangpi ah caan kan hmang. Abikin, Tlangpi ah hin thawhthan kan hmang fawn.
April 10, 2023 - Tlangpi in Tlanglo, Victoria camp le Farkawn camp kan pal hna. Victoria camp ah an hruaitu hna he ton biaruah tinak 2 hrs chung kan ngeih hnu ah Victoria camp ngaihchiatnak tuarpinak le bulhnak $5000.00 kan pek hna. Farkawn khua ralzam hna he pumhnak kan ngeih hnu ah an hruaitu hna he ton biaruah ṭinak kan ngei hna.
April 11-12, 2023 - Farkawn in Vaphai, Zokhuathar camp kan phan. Vaphai ah thaithawh kan dawi i an VCP le YMA hruaitu hna he tonnak kan ngeih hnu ah ralzaam hna he pumhnak le hruaitu hna he bia ruah ṭinak kan ngei. Cun Zokhuathar kan phan i ralzam hna he pumhnak le biaruah tinak kan ngei hna.
April 13 - 17, 2023 - Zokhuathar in Aizawl kan phak hnu ah Doctor hna tonnak le Carson Baptist Church upa hna he ton biaruahnak kan ngeiṭi hna. Khual riahbuk ah thazaang peknak le ṭuanvo ngeitu hna he ṭhuttinak kan ngei. Sunday kan hmang i Carson Baptist church ah thawngtha chimnak le ṭhutṭinak kan ngei than hna. April 18-19, 2023 - Aizawl, Delhi in kan umnak USA dam tein kan rak phan than. Thawngtha Voi 37 phuannak ka ngei kho.
Tutan khual kan tlawnnak ah thawngtha ka chimnak poh ah damnak an hmuh pinah an thilrit in luatnak an co dih hna caah lunglawmnak in ka khat. Plastic inn i a ummi vialte le ei ding ngei lo mi pohpoh, facang le mehmua cawknak ah tiin le dinti a harmi vialte bawmhnak ka tuahmi hna mithmai ceule nih zinglei ni bang a ka enh lioah Uk Cung pa nih “Dim Dim pa, rawl kan ei cang lai” tiah a hung ka thawh. Aize ka mang a si ne ai.
PDF Download
Comentarios